ايم ڪيو ايم پاڪستان ٻيهر سنڌ کي ورهائڻ جو مطالبو ڪري ڇڏيو،

ڪراچي(بيورو رپورٽ) ايم ڪيو ايم پاڪستان ٻيهر سنڌ کي ورهائڻ جو مطالبو ڪري ڇڏيو، سنڌ اسيمبلي ۾ ايم ڪيو ايم جي پارلياماني پارٽي جي اجلاس کانپوءِ...

ڪراچي(بيورو رپورٽ) ايم ڪيو ايم پاڪستان ٻيهر سنڌ کي ورهائڻ جو مطالبو ڪري ڇڏيو، سنڌ اسيمبلي ۾ ايم ڪيو ايم جي پارلياماني پارٽي جي اجلاس کانپوءِ ايم ڪيو ايم جي رابطا ڪاميٽي جي اڳواڻ ڪنور نويد جميل چيو ته سنڌ سرڪار جو رويو تعصباڻو آهي، پ پ سرڪار صوبي ۾ سڀني کي گڏ کڻي هلڻ بدران پاڻ تقسيم واري فارمولا تي هلي رهي آهي. هن چيو ته ٻهراڙي وارن علائقن ۾ رهندڙ ماڻهن جي خلاف ناهيون پر ڪراچي ۽ حيدرآباد جا جعلي ڊوميسائيل ٺهرائي نوڪريون ٻين کي ڏنيون ويون آهن. هن چيو ته پهريان ڪوٽا سسٽم لاڳو ڪري شهرين کي نوڪرين، تعليم ۽ ٻين سهوليتن کان محروم ڪيو ويو، هاڻي وري ڪوڙا ڊوميسائيل ٺهرايا پيا وڃن. هن چيو ته پيپلز پارٽي جي اهڙي تعصباڻي پاليسي سبب سنڌ پبلڪ سروس ڪميشن به تڪراري بڻجي وئي آهي. گذريل نتيجن ۾ به ڪراچي ۽ حيدرآباد ۾ رهندڙ اردو ۽ ٻين ٻولين واري شاگردن کي پاس نه ڪيو ويو. نتيجن کي لڪائڻ لاءِ اميدوارن جي نالن اڳيان سندن ذات به نه لکي وئي. جيئن حيدرآباد ۽ ڪراچي وارن جي خبر ئي نه پوي. هن چيو ته سنڌ يونيورسٽي انتظاميا به اداري ۾ سائن بورڊن تي اردو لکڻ تي پابندي لڳائي چُڪي آهي. 11 سالن دوران پ پ پ ڪوبه تعليمي ۽ طبي ادارو نه جوڙي سگھي آهي. هاڻي ڪراچي جي آ بادي ٻيڻي ٿي وئي آهي. صرف هڪ ادارو لياري ۾ ٺاهيو ويو، جتي به پابندي لڳائي وئي. ايم ڪيو ايم جي اڳواڻ چيو ته اسان پنهنجي مرضي تحت پاڪستان آياسين، ڪراچي کي صوبو بڻائڻ واري صدر ايوب واري فيصلي کي به نه مڃيو. اسان ته ڪراچي کي صوبو بڻائڻ جو مطالبو ئي نه ڪيو هو ۽ هاڻي ڪراچي ۽ حيدرآباد وارن کي سزا ڏني پئي وڃي. هن وڌيڪ چيو ته ستين ڪلاس جي سماجي اڀياس ۾ بينظير ڀٽو جي تصوير لڳائي وئي. بينظير قابلِ احترام آهي پر تعليم کي سياست جي ور نه چاڙهيو وڃي. هن چيو ته اسان جي ٻارن کي غلط تاريخ پڙهائي پئي وڃي. هڪ ڪتاب ۾ ڪراچي ۾ رهندڙ آبادي کي غيررسمي آبادي لکيو ويو. ڪتاب ۾ ڄاڻايو ويو ته 12 لک آبادي بنگلاديش مان ڀڄي آئي. هن چيو ته هُتي توهان ۽ هِتي اسان جو نعرو پيپلز پارٽي ئي لڳايو آهي. ان نعري تي لکين ماڻهن جانين جو نذرانو ڏنو. جنهن بعد بنگلاديش مان ماڻهو هتي پهتا. هن چيو ته بنگالين کي پناهگير ۽ فرار ٿي آيل سڏڻ واري عمل جي مذمت ڪيون ٿا. بنگالين کي ٻڌايون ٿا ته هُو رستن تي نڪري اچن ۽ احتجاج ڪن. هن چيو ته ارڙهين ترميم جي اها مهرباني آهي ته ڪتاب ۾ بينظير ڀٽو جي تصوير ته آهي پر قائد اعظم ۽ علامه اقبال جي تصوير ناهي. ان ترميم جي بنياد تي پاڪستان ورهائڻ جي سازش ڪئي پئي وڃي. اسان کي سنڌ صوبي جي ورهاست گھرجي. اهو مطالبو جاري رهندو،